أحضان الحبايب ... ورد
January 6, 2021 at 11:27 pm,
No comments
ساعات يكفي حضن علشان يمسح أطنان من اللحظات الصعبة
ساعات يكفي حضن علشان تقدر تقول اللي مش قادر تعبر عنه
ساعات "قبلة" ممكن تغطي علي صمت كلمات مش عايزة تطلع
ساعات عايز تلاقي تعبير أنبل و اعمق من كلمة "بحبك" و لكن حتي الكلمات بتنهزم من رهبة المشاعر اللي مالكاك
ساعات بقدر استوعب كل ده جوه قلبي ... و ساعات بيفيض منه
و كأنى بفضي نهر جارف جوه كوباية صغيرة
ساعات بلاقي نفسي ببصلك و افكر "ما اجملك حقآ حبيبتي
ساعات عايزك ليا دايمآ .. حتي و انتي نايمة
و ساعات اعرف ان ده مستحيل و لكني اهرب بحلم بتحلمي بيا فيه
لما بتكوني في حضني .. بحس اننا كائنات بجناح واحد ... و لما بيحضنوا بعض بيتحولوا لكائن واحد يقدر يطير
يطير بعيد عن واقع جاف .. عن ارض بور .. عن عالم عايش غلط .. و نوصل لمكان تاني كل حاجة فيها صح
انتي في حضني .. في مكانك اللي ربنا خلقه علشان يحتويكي .. يحميكي .. و يشعر معاكي بالامان
لو فيه مكان في الكون كله .. ممكن الاقي فيه نبضات قلبي بيعلي صوتها لدرجة خوفي انك تسمعيها
مكان اخاف اتنفس فيه علشان مافقدش لحظة من سعادتي
مكان بيقف فيه الزمن و برجع تاني شاب في اول مشاعر حب
المكان ده هو حضنك
اللي القلب فيه عمره ما بييكبر و العقل عمره ما بيبطل يحلم
نفسي يكون حضننا بيت ... ندخله .. و نرمي مفتاحه
