مشكلة بيروقراطية حوالين إقرار كان لازم املاه قبل السفر خلتني للحظة افكر ان الحل جه من السما و مش حسافر .. لكن العيال الزباله بتوع شركة الطيران قدموا احسن ما عندهم عشان يحلوه .. و فعلآ قدروا .. حطيت راسي في الأرض و مشيت جهة ذبحي .. دورت علي طريقة اسمع عالاقل بيها صوتك قبل ما امشي لكن ما نجحتش ... و طلعت الطيارة و انا حاسس فعلآ بفراغ جوايا ... و لما ابتدت تجري بسرعة و تستعد انها تطير .. صدقيني لا شعوريا لقتني بتتقل جسمي و أسند بدراعي جامد علي دراع الكرسي كأني لا شعوريا بحاول اشدها لتحت مش عايزها تطير . و لكنها طارت
الساعة 17.40
من بعيد قوس قزح وسط السحاب ... و افتكرت القصة اللي بتحكي ان كل قوس قزح بيبتدي في السما و الناحية التانية اللي بتلمس الأرض بيكون فيا جرة دهب .. كنز ... بس من هنا ما اقدرش اشوف الطرف ده.. ما اقدرش اشوف كنزي .. ما اقدرش اشوفك
الساعة 17.50
مرة واحدة اختفت القاهرة تحت السحاب .. طبقة ورا طبقة اتحولت كل حاجة بره للون الأبيض .. و اختفي كل شيء حلو ... و حسيت بكسرة نفس ...مش عارف افكر في اي حاجة و حاسس بخوف جوايا مش عارف ليه ... و قررت اكتبلك السطرين دول علي الاقل احس اني بناجيكي .. بحكيلك ...
الساعة 18.30
بحبك يا "ليلي" .. بحبك بعمري كله ... و بكره أي حاجة بتبعدني عنك
الساعة 20.20
بعد ٣ ساعات تقاااال تقااال جدا عدوا عليا.. ابتدت انوار روما يبانوا ... لكن تاثيرهم عليا باهت... بارد ... مميت